తల తిరుగుడు రోగం
----------------------------
రచన :- గురుమంచి రాజేంద్రశర్మ
ఒక వ్యక్తికి తల తిరుగుడు రోగం పట్టుకుంది. దానికితోడు శ్వాస పరమైన ఇబ్బందులు.
అతని తల్లిదండ్రులు లోకల్ లో ఉండే చాలా మంది డాక్టర్లకు చూయించారు.అయినా తగ్గలేదు.
తర్వాత హైదరాబాదు తీసుకెళ్లి ప్రముఖ ఆస్పత్రిలో చూయించారు.
డాక్టర్లు అన్ని పరీక్షలు చేయించి చివరకు ఆక్సిజన్ తగ్గిందని మందులు రాసిచ్చారు.
ఆ మందులు వాడినా అనారోగ్యం నయం కాలేదు.
దయ్యం-గియ్యం లాంటిది ఏదైనా పట్టుకుందేమోనని కూడా చాలా మందికి చూయించారు.
ఇలా అన్ని రకాలుగా చాలా డబ్బులు ఖర్చు పెట్టుకున్నా ఫలితం రాకపోయేసరికి..
చివరకు ఒక స్వామీజీ దగ్గరకు ఆ అబ్బాయిని తీసుకుని వచ్చి అతని అనారోగ్యం గురించి ప్రశ్నించారు.
ఆ స్వామిజీ ఒక పది నిమిషాలు ధ్యానముద్రలో కి వెళ్లి..
"మీ అబ్బాయికి స్మార్ట్ ఫోన్ కొనిచ్చారా?"
అని ప్రశ్నించాడు.
" అవును స్వామీ! మొన్ననే ఒక ఆరు నెలల క్రితం ఒక మంచి స్మార్ట్ ఫోను కొనిచ్చాము!!" అన్నారు.
" మీ అబ్బాయి శరీరంతో చేసే పనులేవి చేయకుండా అదేపనిగా ఏకాగ్రతగా రోజంతా ఫేస్ బుక్ , వాట్సప్, నెట్ ఇలా వాడుతూ ఉండడం వల్ల శ్వాస తగినంతగా తీసుకోవడం తగ్గిపోయింది.
మీరు గమనించండి! మనం అత్యంత ఏకాగ్రతగా ఉన్నప్పుడు శ్వాస కొన్ని క్షణాలు నిలిచిపోవడమో..లేదా తగ్గడమో జరుగుతుంది. అలాగే మీ బాబుకు కూడా శరీరంలో ఆక్సిజన్ శాతం తగ్గింది.
మీరు డాక్టర్ కు చూయించి మందులు వాడినా.. మీ బాబు ఇంకా ఫోన్ అలాగే వాడడం వల్ల ఫలితం రాలేదు.
ఒక 15 రోజులు ఫోన్ అసలే వాడకుండా 'వేగంగా వీలైనంత వాకింగ్ ', 'శరీరంతో చేసే పనులు'.. ఎక్కువగా చేయుమని చెప్పండి!
ఒక వారం రోజుల్లో అంతా సర్దుకుంటుంది. తర్వాత కూడా శరీరంతో చేసే పనులు చేస్తూ అవసరమైనప్పుడే ఫోన్ వాడేవిధంగా చూసుకోండి నాయనా!!" అంటూ సలహా ఇచ్చాడు స్వామిజీ.
"ధన్యవాదాలు స్వామీ!" అంటూ ఆ అబ్బాయి తల్లిదండ్రులు తృప్తిగా స్వామిజీకి నమస్కరించారు.
✡️✡️✡️✡️✡️
ఓపికగా చదివిన వారికి
ధన్యవాదములతో..
గురుమంచి రాజేంద్రశర్మ.
No comments:
Post a Comment